ye zara sa kuchh aur ek-dam be-hisab sa kuchh

ye zarā sā kuchh aur ek-dam be-hisāb sā kuchh

sar-e-shām siine meñ hāñptā hai sarāb sā kuchh

vo chamak thī kyā jo pighal ga.ī hai navāh-e-jāñ meñ

ki ye aañkh meñ kyā hai shola-e-zer-e-āb sā kuchh

kabhī mehrbāñ aañkh se parakh is ko kyā hai ye shai

hameñ kyuuñ hai siine meñ is sabab iztirāb sā kuchh

vo fazā na jaane savāl karne ke baa'd kyā thī

ki hile to the lab, milā ho shāyad javāb sā kuchh

mire chaar jānib ye khiñch ga.ī hai qanāt kaisī

ye dhuāñ hai ḳhatm-e-safar kā yā TuuTe ḳhvāb sā kuchh

vo kahe zarā kuchh to dil ko kyā kyā ḳhalal satā.e

ki na jaane us kī hai baat meñ kyā ḳharāb sā kuchh

na ye ḳhaak kā ijtināb hī koī rāsta de

na uḌaan bharne de sar pe ye pech-o-tāb sā kuchh

sar-e-sharh-o-iz.hār jaane kaisī havā chalī hai

ki bikhar gayā hai suḳhan suḳhan intiḳhāb sā kuchh

ye bahār-e-be-sāḳhta chalī aa.ī hai kahāñ se

tan-e-zard meñ khil uThā hai piile gulāb sā kuchh

are kyā batā.eñ havā-e-imkāñ ke khel kyā haiñ

ki diloñ meñ bantā hai TūTtā hai habāb sā kuchh

kabhī ek pal bhī na saañs lī khul ke ham ne 'bānī'

rahā 'umr bhar bas-ki jism o jaañ meñ 'azāb sā kuchh

ye zara sa kuchh aur ek-dam be-hisab sa kuchh

sar-e-sham sine mein hanpta hai sarab sa kuchh

wo chamak thi kya jo pighal gai hai nawah-e-jaan mein

ki ye aankh mein kya hai shola-e-zer-e-ab sa kuchh

kabhi mehrban aankh se parakh is ko kya hai ye shai

hamein kyun hai sine mein is sabab iztirab sa kuchh

wo faza na jaane sawal karne ke ba'd kya thi

ki hile to the lab, mila ho shayad jawab sa kuchh

mere chaar jaanib ye khinch gai hai qanat kaisi

ye dhuan hai KHatm-e-safar ka ya TuTe KHwab sa kuchh

wo kahe zara kuchh to dil ko kya kya KHalal satae

ki na jaane us ki hai baat mein kya KHarab sa kuchh

na ye KHak ka ijtinab hi koi rasta de

na uDan bharne de sar pe ye pech-o-tab sa kuchh

sar-e-sharh-o-izhaar jaane kaisi hawa chali hai

ki bikhar gaya hai suKHan suKHan intiKHab sa kuchh

ye bahaar-e-be-saKHta chali aai hai kahan se

tan-e-zard mein khil uTha hai pile gulab sa kuchh

are kya bataen hawa-e-imkan ke khel kya hain

ki dilon mein banta hai TuTta hai habab sa kuchh

kabhi ek pal bhi na sans li khul ke hum ne 'bani'

raha 'umr bhar bas-ki jism o jaan mein 'azab sa kuchh