ye zarurat hai to phir isko zarurat se na dekh

ye zarūrat hai to phir is ko zarūrat se na dekh

apnī chāhat ko kisī aur kī chāhat se na dekh

tujh meñ aur mujh meñ koī farq nahīñ hai lekin

tū sharāfat ko mirī apnī sharāfat se na dekh

mujh ko ho jā.egī ab mujh se hī nafrat varna

ai mirī jaan mujhe itnī mohabbat se na dekh

hañs ke har bojh zamāne kā uThā letā huuñ

maiñ huuñ mazdūr mujhe itnī hiqārat se na dekh

ham-nashīnī kā sharaf sab ko kahāñ miltā hai

tere pahlū meñ jo baiThā huuñ to hairat se na dekh

husn-bīnī ke bhī ādāb huā karte haiñ

us ke chehre kī taraf itnī jasārat se na dekh

us se māñgā hai kahāñ maiñ ne koī harf-e-qisās

mere qātil se ye kah mujh ko nadāmat se na dekh

ye zarurat hai to phir is ko zarurat se na dekh

apni chahat ko kisi aur ki chahat se na dekh

tujh mein aur mujh mein koi farq nahin hai lekin

tu sharafat ko meri apni sharafat se na dekh

mujh ko ho jaegi ab mujh se hi nafrat warna

ai meri jaan mujhe itni mohabbat se na dekh

hans ke har bojh zamane ka uTha leta hun

main hun mazdur mujhe itni hiqarat se na dekh

ham-nashini ka sharaf sab ko kahan milta hai

tere pahlu mein jo baiTha hun to hairat se na dekh

husn-bini ke bhi aadab hua karte hain

us ke chehre ki taraf itni jasarat se na dekh

us se manga hai kahan main ne koi harf-e-qisas

mere qatil se ye kah mujh ko nadamat se na dekh