یہ زندگی اب اور نہیں چاہیے مجھے

یہ زندگی اب اور نہیں چاہیے مجھے

وہ دے سکے تو موت حسیں چاہیے مجھے

یہ خوف تھا کہ مل کے بھی کھو جائے گا وہ شخص

سو میں نے کہہ دیا کہ نہیں چاہیے مجھے

گھر چھوڑنا ہے چھوڑ مگر اتنا یاد رکھ

جو چیز جس جگہ تھی وہیں چاہیے مجھے

بے جوڑ دوستی ہے مری میرے دل کے ساتھ

جو اس کو چاہیے ہے نہیں چاہیے مجھے

میں اس لئے کھلونا کوئی دیکھتا نہ تھا

ماں باپ سوچ لیں نہ کہیں چاہیے مجھے

اک تو میں مثل دشت کوئی ریت کا مکاں

اور اس پہ مستزاد مکیں چاہیے مجھے