ye zindagi tamam bita di hai pyas mein

ye zindagī tamām bitā dī hai pyaas meñ

phir kyoñ har ek raat bitāte haiñ aas meñ

sab yaar sochte the rahegā vahī samāñ

ik maiñ hī bas bachā huuñ koī sau pachās meñ

maiñ ghol kar ke pī gayā huuñ zindagī ko yuuñ

puurī kitāb bas ga.ī hai iqtibās meñ

ham ne bhī to nikāle haiñ nāsūr kaaT kar

ham ne bhī din guzāre haiñ kaale libās meñ

tum jaam māñgte ho baḌī chhoTī chiiz hai

maiñ dhaḌkaneñ rakhūñ jo kaho is gilās meñ

kaise 'amān' ab ye sudhar jaa.eñ 'ādateñ

ham ne bitā.e din haiñ ḳharāboñ ke paas meñ

ye zindagi tamam bita di hai pyas mein

phir kyon har ek raat bitate hain aas mein

sab yar sochte the rahega wahi saman

ek main hi bas bacha hun koi sau pachas mein

main ghol kar ke pi gaya hun zindagi ko yun

puri kitab bas gai hai iqtibas mein

hum ne bhi to nikale hain nasur kaT kar

hum ne bhi din guzare hain kale libas mein

tum jam mangte ho baDi chhoTi chiz hai

main dhaDkanen rakhun jo kaho is gilas mein

kaise 'aman' ab ye sudhar jaen 'adaten

hum ne bitae din hain KHarabon ke pas mein