یوںہی بے وجہ تو وہ ہم سے نہ بچھڑا ہوگا

یوںہی بے وجہ تو وہ ہم سے نہ بچھڑا ہوگا

کچھ نہ کچھ اس نے بچھڑتے ہوئے سوچا ہوگا

کیا کہیں سوچ کے آتا ہے کلیجہ منہ کو

کس طرح غیر کے پہلو میں وہ بیٹھا ہوگا

خودکشی کہہ کے نہ ٹالو اسے تحقیق کرو

اس کو یاروں نے ہی کھائی میں دھکیلا ہوگا

گو مجھے بھول گیا تھا وہ مگر یہ طے ہے

وہ سر راہ مجھے دیکھ کے چونکا ہوگا

کیا اسے میری طبیعت کی بھی اب فکر نہیں

یا کسی دوست سے اس نے مرا پوچھا ہوگا

تو نے جو شخص چنا ہے یہ یقیں ہے مجھ کو

مجھ سے بڑھ کر وہ ترے پہلو میں جچتا ہوگا

اے مری جان غزل یہ تو بتا وہ حیدرؔ

وہ جو شاعر تھا تجھے یاد تو آتا ہوگا