yun aap jo aasuda-e-gham karte rahenge

yuuñ aap jo āsūda-e-ġham karte raheñge

ham dard-e-dil-o-jān ko kam karte raheñge

samjhe the ki vo shikve gile bhuul ga.e haiñ

ma.alūm na thā dil pe raqam karte raheñge

rakkheñge tire ġham ko zamāne se chhupā kar

tanhā.ī meñ ham aañkh ko nam karte raheñge

āzār pe āzār diye jā.eñge hañs kar

har haal meñ vo ham pe karam karte raheñge

kyā apnī haqīqat hai sivā terī atā ke

ham ḳhud ko tirī zaat meñ zam karte raheñge

jazbāt se me.aar se yā ḳhūn-e-jigar se

ham parvarish-e-lauh-o-qalam karte raheñge

īmān kī daulat hai kahīñ kufr kā ġhalba

sab zikr-e-ḳhudā zikr-e-sanam karte raheñge

hālāt na badleñ na sahī phir bhī ai 'mīnā'

koshish to magar ahl-e-qalam karte raheñge

yun aap jo aasuda-e-gham karte rahenge

hum dard-e-dil-o-jaan ko kam karte rahenge

samjhe the ki wo shikwe gile bhul gae hain

malum na tha dil pe raqam karte rahenge

rakkhenge tere gham ko zamane se chhupa kar

tanhai mein hum aankh ko nam karte rahenge

aazar pe aazar diye jaenge hans kar

har haal mein wo hum pe karam karte rahenge

kya apni haqiqat hai siwa teri ata ke

hum KHud ko teri zat mein zam karte rahenge

jazbaat se mear se ya KHun-e-jigar se

hum parwarish-e-lauh-o-qalam karte rahenge

iman ki daulat hai kahin kufr ka ghalba

sab zikr-e-KHuda zikr-e-sanam karte rahenge

haalat na badlen na sahi phir bhi ai 'mina'

koshish to magar ahl-e-qalam karte rahenge