yun apne dil ko bahlane lage hain

yuuñ apne dil ko bahlāne lage haiñ

lipaT kar ḳhud ke hī shāne lage haiñ

hameñ to maut bhī āsāñ nahīñ thī

so ab zinda nazar aane lage haiñ

udāsī is qadar haavī thī ham par

ki ḳhush hone pe itrāne lage haiñ

jo dekhī ik shikārī kī udāsī

parinde lauT kar aane lage haiñ

salīqe se lipaT kar paaoñ se ab

ye ġham zanjīr pahnāne lage haiñ

ġhamoñ kī dhuup baḌhtī jā rahī hai

ḳhushī ke phuul murjhāne lage haiñ

faqat ab chand qadmoñ pe hai manzil

magar ham haiñ ki sustāne lage haiñ

yun apne dil ko bahlane lage hain

lipaT kar KHud ke hi shane lage hain

hamein to maut bhi aasan nahin thi

so ab zinda nazar aane lage hain

udasi is qadar hawi thi hum par

ki KHush hone pe itrane lage hain

jo dekhi ek shikari ki udasi

parinde lauT kar aane lage hain

saliqe se lipaT kar paon se ab

ye gham zanjir pahnane lage hain

ghamon ki dhup baDhti ja rahi hai

KHushi ke phul murjhane lage hain

faqat ab chand qadmon pe hai manzil

magar hum hain ki sustane lage hain