yun ba-zahir hai gulsitan ki tarah

yuuñ ba-zāhir hai gulsitāñ kī tarah

ziist hai mausam-e-ḳhizāñ kī tarah

pahle dil meñ samāyā vo aur phir

chhā gayā gard-e-āsmāñ kī tarah

vo muqaddas kitāb kī mānind

aur maiñ hāfiz-e-qurāñ kī tarah

bhuul kar us ko maiñ ne kī hai bhuul

jism meñ thā mire vo jaañ kī tarah

vo dhaḌak kar na raaz sab kah de

dil sañbhāle raho zabāñ kī tarah

qahqahe bhī lagāo kuchh nāseh

ġham meñ ho jāoge kamāñ kī tarah

niklā zāhid bhī saath mai pī kar

maiñ javāñ aur vo naujavāñ kī tarah

us kā har lamha lamha hai anmol

aur maiñ umr-e-rā.egāñ kī tarah

maiñ satah par habāb sā larzāñ

aur vo bahr-e-be-karāñ kī tarah

maiñ hisāb-o-kitāb se ḳhā.if

aur vaqt sar pe imtihāñ kī tarah

maiñ to tanhā guzar gayā 'shāhid'

vo jo guzrā to kārvāñ kī tarah

yun ba-zahir hai gulsitan ki tarah

zist hai mausam-e-KHizan ki tarah

pahle dil mein samaya wo aur phir

chha gaya gard-e-asman ki tarah

wo muqaddas kitab ki manind

aur main hafiz-e-quran ki tarah

bhul kar us ko main ne ki hai bhul

jism mein tha mere wo jaan ki tarah

wo dhaDak kar na raaz sab kah de

dil sanbhaale raho zaban ki tarah

qahqahe bhi lagao kuchh naseh

gham mein ho jaoge kaman ki tarah

nikla zahid bhi sath mai pi kar

main jawan aur wo naujawan ki tarah

us ka har lamha lamha hai anmol

aur main umr-e-raegan ki tarah

main satah par habab sa larzan

aur wo bahr-e-be-karan ki tarah

main hisab-o-kitab se KHaif

aur waqt sar pe imtihan ki tarah

main to tanha guzar gaya 'shahid'

wo jo guzra to karwan ki tarah