یوں بظاہر ہے گلستاں کی طرح

یوں بظاہر ہے گلستاں کی طرح

زیست ہے موسم خزاں کی طرح

پہلے دل میں سمایا وہ اور پھر

چھا گیا گرد آسماں کی طرح

وہ مقدس کتاب کی مانند

اور میں حافظ قرآں کی طرح

بھول کر اس کو میں نے کی ہے بھول

جسم میں تھا مرے وہ جاں کی طرح

وہ دھڑک کر نہ راز سب کہہ دے

دل سنبھالے رہو زباں کی طرح

قہقہے بھی لگاؤ کچھ ناصح

غم میں ہو جاؤ گے کماں کی طرح

نکلا زاہد بھی ساتھ مے پی کر

میں جواں اور وہ نوجواں کی طرح

اس کا ہر لمحہ لمحہ ہے انمول

اور میں عمر رائیگاں کی طرح

میں سطح پر حباب سا لرزاں

اور وہ بحر بیکراں کی طرح

میں حساب و کتاب سے خائف

اور وقت سر پہ امتحاں کی طرح

میں تو تنہا گزر گیا شاہدؔ

وہ جو گزرا تو کارواں کی طرح