yun bhi ras aai nahin uski wafa tum rakh lo

yuuñ bhī raas aa.ī nahīñ us kī vafā tum rakh lo

mujh ko bīmār hī rahne do davā tum rakh lo

band kamroñ kī ghuTan mere liye rahne do

ye jo aatī hai darīchoñ se havā tum rakh lo

merī rāhoñ meñ bichhā do tum añdhere saare

aur ye lo mire hisse kā diyā tum rakh lo

oḌh kar baiTh ga.ī huuñ maiñ dukhoñ kī chādar

ye ḳhushī aur ye ḳhushbu-e-qabā tum rakh lo

mujh ko ye nūr-e-qamar tīrgī se hāsil hai

mere andar se jo niklī hai ziyā tum rakh lo

paas baiThe koī dil khol ke do baat kare

baaqī duniyā ke ye atvār-o-adā tum rakh lo

merī maañ to mirī jannat ko liye baiThī hai

aisā kar lo mire purkhoñ kī duā tum rakh lo

maiñ gunahgār hī achchhī huuñ barā-e-mahfil

ye jo tum bechte phirte ho ḳhudā tum rakh lo

yun bhi ras aai nahin us ki wafa tum rakh lo

mujh ko bimar hi rahne do dawa tum rakh lo

band kamron ki ghuTan mere liye rahne do

ye jo aati hai darichon se hawa tum rakh lo

meri rahon mein bichha do tum andhere sare

aur ye lo mere hisse ka diya tum rakh lo

oDh kar baiTh gai hun main dukhon ki chadar

ye KHushi aur ye KHushbu-e-qaba tum rakh lo

mujh ko ye nur-e-qamar tirgi se hasil hai

mere andar se jo nikli hai ziya tum rakh lo

pas baiThe koi dil khol ke do baat kare

baqi duniya ke ye atwar-o-ada tum rakh lo

meri man to meri jannat ko liye baiThi hai

aisa kar lo mere purkhon ki dua tum rakh lo

main gunahgar hi achchhi hun bara-e-mahfil

ye jo tum bechte phirte ho KHuda tum rakh lo