yun bhi shab-e-firaq saza kaTte rahe

yuuñ bhī shab-e-firāq sazā kāTte rahe

likh likh ke ḳhat pe un kā pata kāTte rahe

ahl-e-havas ne kaaT lī sone kī khetiyāñ

ḳhuddār log fasl-e-anā kāTte rahe

jo jis ke thā nasīb meñ le kar chalā gayā

qistoñ meñ apne bhaa.ī galā kāTte rahe

jin ko payām-e-amn se parḳhāsh thī bahut

vo par kabūtaroñ ke sadā kāTte rahe

tūfāñ kā zor kam huā lahreñ bhī tham ga.iiñ

dariyāoñ meñ safīne havā kāTte rahe

har gaam par thā maañ kī duāoñ kā aasrā

dushman hazār dast-e-duā kāTte rahe

'sarvat' kisī maqām pe khaa.ī nahīñ shikast

rasta safar meñ rāh-numā kāTte rahe

yun bhi shab-e-firaq saza kaTte rahe

likh likh ke KHat pe un ka pata kaTte rahe

ahl-e-hawas ne kaT li sone ki khetiyan

KHuddar log fasl-e-ana kaTte rahe

jo jis ke tha nasib mein le kar chala gaya

qiston mein apne bhai gala kaTte rahe

jin ko payam-e-amn se parKHash thi bahut

wo par kabutaron ke sada kaTte rahe

tufan ka zor kam hua lahren bhi tham gain

dariyaon mein safine hawa kaTte rahe

har gam par tha man ki duaon ka aasra

dushman hazar dast-e-dua kaTte rahe

'sarwat' kisi maqam pe khai nahin shikast

rasta safar mein rah-numa kaTte rahe