yun bichhaD jaunga tum se maine ye socha na tha

yuuñ bichhaḌ jā.ūñgā tum se maiñ ne ye sochā na thā

qurbatoñ meñ fāsloñ kā koī andāza na thā

jaane pahchāne hue chehre bhī sab the ajnabī

kitnā tanhā thā vahāñ bhī maiñ jahāñ tanhā na thā

apne dil kā zahr-e-ġham āñkhoñ se jo chhalkā gayā

vo samundar thā magar merī tarah gahrā na thā

zindagī ham bhī tirī qadroñ ke vāris the magar

apnī qismat meñ faqat dīvār thī saaya na thā

har taraf hai ab mirī ḳhāmoshiyoñ kī bāzgasht

zindagī meñ is se pahle itnā sannāTā na thā

rūThne vaale mirī chāhat kā andāza to kar

is qadar to maiñ ne ḳhud ko bhī kabhī chāhā na thā

zaḳhm bhī jis ne diye haiñ mujh ko ġhairoñ kī tarah

vo mirā apnā thā lekin mujh ko pahchānā na thā

pyaar āḳhir kyoñ na aatā apne qātil par mujhe

mere us ke darmiyāñ kyā ḳhuun kā rishta na thā

be-vafā.ī kī shikāyat thī mujhe us se magar

us kī majbūrī ko jab tak 'badr' maiñ samjhā na thā

yun bichhaD jaunga tum se main ne ye socha na tha

qurbaton mein faslon ka koi andaza na tha

jaane pahchane hue chehre bhi sab the ajnabi

kitna tanha tha wahan bhi main jahan tanha na tha

apne dil ka zahr-e-gham aankhon se jo chhalka gaya

wo samundar tha magar meri tarah gahra na tha

zindagi hum bhi teri qadron ke waris the magar

apni qismat mein faqat diwar thi saya na tha

har taraf hai ab meri KHamoshiyon ki bazgasht

zindagi mein is se pahle itna sannaTa na tha

ruThne wale meri chahat ka andaza to kar

is qadar to main ne KHud ko bhi kabhi chaha na tha

zaKHm bhi jis ne diye hain mujh ko ghairon ki tarah

wo mera apna tha lekin mujh ko pahchana na tha

pyar aaKHir kyon na aata apne qatil par mujhe

mere us ke darmiyan kya KHun ka rishta na tha

be-wafai ki shikayat thi mujhe us se magar

us ki majburi ko jab tak 'badr' main samjha na tha