yun dekhne mein to bas KHak-e-muKHtasar hun main

yuuñ dekhne meñ to bas ḳhāk-e-muḳhtasar huuñ maiñ

mujhe kured kabhī ḳhud meñ bahr-o-bar huuñ maiñ

azal se tā-ba-abad phailī haiñ jaḌeñ merī

kabhī na aa.ī ḳhizāñ jis pe vo shajar huuñ maiñ

hai ba.ad-e-ḳhuld-badar ik azāb-e-dar-badrī

jise talāsh hai manzil kī vo ḳhizar huuñ maiñ

kabhī nigāhoñ meñ hotā hai ālam-e-bālā

kabhī vajūd se hī apne be-ḳhabar huuñ maiñ

hai zaat merī kabhī to sabhī dukhoñ kā ilaaj

kabhī lage hai ki tiryāq-e-be-asar huuñ maiñ

mire vajūd pe hai munhasir tirī ta.adād

agarche terī nazar meñ bas ik sifar huuñ maiñ

samajh ke harf-e-mukarrar jo lauh-e-hastī par

zamāna garche hai munkir mirā magar huuñ maiñ

nahīñ hai bazm-e-ḳhirad meñ jo merī qadr to kyā

nigāh-e-ahl-e-junūñ meñ to mo'atabar huuñ maiñ

mirī zabān-e-sadāqat kā jurm hai 'ḳhāvar'

zamāna mujh ko samajhtā hai ḳhīra-sar huuñ maiñ

yun dekhne mein to bas KHak-e-muKHtasar hun main

mujhe kured kabhi KHud mein bahr-o-bar hun main

azal se ta-ba-abad phaili hain jaDen meri

kabhi na aai KHizan jis pe wo shajar hun main

hai baad-e-KHuld-badar ek azab-e-dar-badri

jise talash hai manzil ki wo KHizar hun main

kabhi nigahon mein hota hai aalam-e-baala

kabhi wajud se hi apne be-KHabar hun main

hai zat meri kabhi to sabhi dukhon ka ilaj

kabhi lage hai ki tiryaq-e-be-asar hun main

mere wajud pe hai munhasir teri tadad

agarche teri nazar mein bas ek sifar hun main

samajh ke harf-e-mukarrar jo lauh-e-hasti par

zamana garche hai munkir mera magar hun main

nahin hai bazm-e-KHirad mein jo meri qadr to kya

nigah-e-ahl-e-junun mein to mo'atabar hun main

meri zaban-e-sadaqat ka jurm hai 'KHawar'

zamana mujh ko samajhta hai KHira-sar hun main