yun dil mein ehtimam-e-umid-e-visal hai

yuuñ dil meñ ehtimām-e-umīd-e-visāl hai

is hādse kā jaise koī ehtimāl hai

har chand aarzū mirī amr-e-muhāl hai

ḳhush huuñ ki vaj.h-e-raunaq-e-bazm-e-ḳhayāl hai

dekhā nigār-ḳhāna-e-māzī meñ jhāñk kar

kitnā ajiib silsila-e-māh-o-sāl hai

lauT aa.e tishna-kām hī dekhā agar kabhī

ā.īna-e-ḳhulūs meñ saaqī ke baal hai

ḳhvāboñ ke sarv yuuñ to bahut dil-fareb haiñ

vo paikar-e-jamāl magar be-misāl hai

'qāzī' shab-e-hayāt kahīñ be-karāñ na ho

bazm-e-vafā meñ zikr-e-sahar ḳhāl-ḳhāl hai

yun dil mein ehtimam-e-umid-e-visal hai

is hadse ka jaise koi ehtimal hai

har chand aarzu meri amr-e-muhaal hai

KHush hun ki wajh-e-raunaq-e-bazm-e-KHayal hai

dekha nigar-KHana-e-mazi mein jhank kar

kitna ajib silsila-e-mah-o-sal hai

lauT aae tishna-kaam hi dekha agar kabhi

aaina-e-KHulus mein saqi ke baal hai

KHwabon ke sarw yun to bahut dil-fareb hain

wo paikar-e-jamal magar be-misal hai

'qazi' shab-e-hayat kahin be-karan na ho

bazm-e-wafa mein zikr-e-sahar KHal-KHal hai