yun ehtimam-e-radd-e-sahar kar diya gaya

yuuñ ehtimām-e-radd-e-sahar kar diyā gayā

har raushnī ko shahr-badar kar diyā gayā

apne gharoñ ke sukh se bhī rū-kash dikhā.ī deñ

logoñ ko mubtalā-e-safar kar diyā gayā

jiinā har ek ke liye mumkin nahīñ rahā

jiine ko ek kār-e-hunar kar diyā gayā

chehroñ se rañg haath se ā.īne chhīn kar

be-chehragī ko raḳht-e-nazar kar diyā gayā

ab jism-o-jāñ pe haqq-e-tasarruf talab kare

zālim ko is qadar to niDar kar diyā gayā

darpai the har shajar ke ta.affun-shi.ār log

mahrūm ḳhushbuoñ se nagar kar diyā gayā

vo qaht-e-ġham paḌā hai ki ik Tiis ke liye

ahl-e-karam kā dast-e-nigar kar diyā gayā

yun ehtimam-e-radd-e-sahar kar diya gaya

har raushni ko shahr-badar kar diya gaya

apne gharon ke sukh se bhi ru-kash dikhai den

logon ko mubtala-e-safar kar diya gaya

jina har ek ke liye mumkin nahin raha

jine ko ek kar-e-hunar kar diya gaya

chehron se rang hath se aaine chhin kar

be-chehragi ko raKHt-e-nazar kar diya gaya

ab jism-o-jaan pe haqq-e-tasarruf talab kare

zalim ko is qadar to niDar kar diya gaya

darpai the har shajar ke taffun-shiar log

mahrum KHushbuon se nagar kar diya gaya

wo qaht-e-gham paDa hai ki ek Tis ke liye

ahl-e-karam ka dast-e-nigar kar diya gaya