yun hasraton ki bhiD hai tanhaiyon ke pas

yuuñ hasratoñ kī bhiiḌ hai tanhā.iyoñ ke paas

jaise mahal meñ dāsiyāñ shahzādiyoñ ke paas

bachche jhulas na jaa.eñ jahālat kī aag meñ

rakhiye na is kapās ko chiñgāriyoñ ke paas

jin rahbaroñ ke dil meñ har ik kā ḳhayāl thā

vo nau-ratan nahīñ rahe darbāriyoñ ke paas

vo sādgī vo nāz-o-adā ḳhvāb ho ga.e

bas ḳhud-numā.ī rah ga.ī añgḌā.iyoñ ke paas

daur-e-jadīd aaj taraqqī kī aaḌ meñ

sab de chukā burā.iyāñ ābādiyoñ ke paas

tanhā samajh rahe haiñ use is jahāñ ke log

lekin hai dil ḳhayāloñ kī gahrā.iyoñ ke paas

yun hasraton ki bhiD hai tanhaiyon ke pas

jaise mahal mein dasiyan shahzadiyon ke pas

bachche jhulas na jaen jahaalat ki aag mein

rakhiye na is kapas ko chingariyon ke pas

jin rahbaron ke dil mein har ek ka KHayal tha

wo nau-ratan nahin rahe darbariyon ke pas

wo sadgi wo naz-o-ada KHwab ho gae

bas KHud-numai rah gai angDaiyon ke pas

daur-e-jadid aaj taraqqi ki aaD mein

sab de chuka buraiyan aabaadiyon ke pas

tanha samajh rahe hain use is jahan ke log

lekin hai dil KHayalon ki gahraiyon ke pas