yun hi rakkhoge imtihan mein kya

yuuñ hī rakkhoge imtihāñ meñ kyā

nahīñ aa.egī jaan jaañ meñ kyā

kyuuñ sadā kā nahīñ javāb aatā

koī rahtā nahīñ makāñ meñ kyā

ik zamāna hai rū-ba-rū mere

tum na aaoge darmiyāñ meñ kyā

vo jo qisse diloñ ke andar haiñ

vo bhī lāoge darmiyāñ meñ kyā

kis qadar talḳhiyāñ haiñ lahje meñ

zahr bote ho tum zabāñ meñ kyā

dil ko shikva nahīñ koī tum se

ham ne rahnā nahīñ jahāñ meñ kyā

vo jo ik lafz e'tibār kā thā

ab nahīñ hai vo darmiyāñ meñ kyā

mere ḳhvāboñ ke jo parinde the

haiñ abhī tak tirī amaañ meñ kyā

ab to ye bhī nahīñ ḳhayāl aatā

chhoḌ aa.e the is jahāñ meñ kyā

ye bakheḌā jo zindagī kā hai

chhoḌ duuñ us ko darmiyāñ meñ kyā

chand va.ade the chand da.ave the

aur rakhā thā dāstāñ meñ kyā

jaane vo dil thā yā diyā koī

raat jaltā thā sham.a-dāñ meñ kyā

yun hi rakkhoge imtihan mein kya

nahin aaegi jaan jaan mein kya

kyun sada ka nahin jawab aata

koi rahta nahin makan mein kya

ek zamana hai ru-ba-ru mere

tum na aaoge darmiyan mein kya

wo jo qisse dilon ke andar hain

wo bhi laoge darmiyan mein kya

kis qadar talKHiyan hain lahje mein

zahr bote ho tum zaban mein kya

dil ko shikwa nahin koi tum se

hum ne rahna nahin jahan mein kya

wo jo ek lafz e'tibar ka tha

ab nahin hai wo darmiyan mein kya

mere KHwabon ke jo parinde the

hain abhi tak teri aman mein kya

ab to ye bhi nahin KHayal aata

chhoD aae the is jahan mein kya

ye bakheDa jo zindagi ka hai

chhoD dun us ko darmiyan mein kya

chand wade the chand dawe the

aur rakha tha dastan mein kya

jaane wo dil tha ya diya koi

raat jalta tha shama-dan mein kya