yun hirasan hain musafir bastiyon ke darmiyan

yuuñ hirāsāñ haiñ musāfir bastiyoñ ke darmiyāñ

ho ga.ī ho shaam jaise jañgaloñ ke darmiyāñ

zindagī se ab yahī do-chār pal kā saath hai

pāniyoñ se aa gayā huuñ daldaloñ ke darmiyāñ

chaar jānib phailte hī jā rahe haiñ regzār

tishnagī hī tishnagī hai ḳhvāhishoñ ke darmiyāñ

dekhte hī dekhte aapas meñ dushman ho ga.e

ḳhuun kā dariyā ravāñ hai bhā.iyoñ ke darmiyāñ

ab to is kī zad meñ hai saarā nagar aayā huā

vo bhī din the sail thā jab sāhiloñ ke darmiyāñ

adh-khulī āñkheñ haiñ 'ḳhāvar' aur sāñsoñ kā azaab

laash kī sūrat paḌā huuñ kargasoñ ke darmiyāñ

yun hirasan hain musafir bastiyon ke darmiyan

ho gai ho sham jaise jangalon ke darmiyan

zindagi se ab yahi do-chaar pal ka sath hai

paniyon se aa gaya hun daldalon ke darmiyan

chaar jaanib phailte hi ja rahe hain regzar

tishnagi hi tishnagi hai KHwahishon ke darmiyan

dekhte hi dekhte aapas mein dushman ho gae

KHun ka dariya rawan hai bhaiyon ke darmiyan

ab to is ki zad mein hai sara nagar aaya hua

wo bhi din the sail tha jab sahilon ke darmiyan

adh-khuli aankhen hain 'KHawar' aur sanson ka azab

lash ki surat paDa hun kargason ke darmiyan