yun in aankhon ko taDapne ki saza di usne

yuuñ in āñkhoñ ko taḌapne kī sazā dī us ne

apnī tasvīr hī D-P se haTā dī us ne

parda-poshī kī jazā kyā use mā'lūm nahīñ

raaz kī baat thī par sab ko batā dī us ne

pahle maiñ dil se gayā baa'd nigāhoñ se bhī

ek hī jurm kī do baar sazā dī us ne

pahle taktā rahā khiḌkī se vo ḳhāmoshī se

aur phir car kī raftār baḌhā dī us ne

kaisī ab sālgirah kaisī badhā.ī yaaro

vo jo bichhḌā to mirī 'umr ghaTā dī us ne

gar palaTtā to ye tauhīn-e-anā ho jaatī

maiñ ne dekhā hī nahīñ ḳhuub sadā dī us ne

pahle har ḳhat mirā jī bhar ke nihārā 'sāhil'

aur phir un meñ vahīñ aag lagā dī us ne

yun in aankhon ko taDapne ki saza di us ne

apni taswir hi D-P se haTa di us ne

parda-poshi ki jaza kya use ma'lum nahin

raaz ki baat thi par sab ko bata di us ne

pahle main dil se gaya ba'd nigahon se bhi

ek hi jurm ki do bar saza di us ne

pahle takta raha khiDki se wo KHamoshi se

aur phir car ki raftar baDha di us ne

kaisi ab salgirah kaisi badhai yaro

wo jo bichhDa to meri 'umr ghaTa di us ne

gar palaTta to ye tauhin-e-ana ho jati

main ne dekha hi nahin KHub sada di us ne

pahle har KHat mera ji bhar ke nihaara 'sahil'

aur phir un mein wahin aag laga di us ne