یوں ان آنکھوں کو تڑپنے کی سزا دی اس نے

یوں ان آنکھوں کو تڑپنے کی سزا دی اس نے

اپنی تصویر ہی ڈی پی سے ہٹا دی اس نے

پردہ پوشی کی جزا کیا اسے معلوم نہیں

راز کی بات تھی پر سب کو بتا دی اس نے

پہلے میں دل سے گیا بعد نگاہوں سے بھی

ایک ہی جرم کی دو بار سزا دی اس نے

پہلے تکتا رہا کھڑکی سے وہ خاموشی سے

اور پھر کار کی رفتار بڑھا دی اس نے

کیسی اب سالگرہ کیسی بدھائی یارو

وہ جو بچھڑا تو مری عمر گھٹا دی اس نے

گر پلٹتا تو یہ توہین انا ہو جاتی

میں نے دیکھا ہی نہیں خوب صدا دی اس نے

پہلے ہر خط مرا جی بھر کے نہارا ساحلؔ

اور پھر ان میں وہیں آگ لگا دی اس نے