yun KHalaon mein nihayat ghaur se dekha na kar

yuuñ ḳhalāoñ meñ nihāyat ġhaur se dekhā na kar

mere baare meñ mirī jaañ is qadar sochā na kar

bandagī ko log de lete haiñ kamzorī kā naam

'ijz achchhā hai magar tū ḳhud ko naqsh-e-pā na kar

ho sake to dil meñ paidā kar mohabbat kā ḳhayāl

ye muqaddas lafz sat.h-e-āb par likhā na kar

reza reza ho rahe haiñ aa.ine iḳhlās ke

apnī āñkhoñ se ye manzar dekh par shikva na kar

de sake tujh ko kabhī terī vafāoñ kā javāb

us havāle se kabhī ruḳh jānib-e-duniyā na kar

jin kī tā'bīreñ nahīñ mumkin kabhī sultān-'rashk'

ho sake to is tarah ke ḳhvāb bhī dekhā na kar

yun KHalaon mein nihayat ghaur se dekha na kar

mere bare mein meri jaan is qadar socha na kar

bandagi ko log de lete hain kamzori ka nam

'ijz achchha hai magar tu KHud ko naqsh-e-pa na kar

ho sake to dil mein paida kar mohabbat ka KHayal

ye muqaddas lafz sath-e-ab par likha na kar

reza reza ho rahe hain aaine iKHlas ke

apni aankhon se ye manzar dekh par shikwa na kar

de sake tujh ko kabhi teri wafaon ka jawab

us hawale se kabhi ruKH jaanib-e-duniya na kar

jin ki ta'biren nahin mumkin kabhi sultan-'rashk'

ho sake to is tarah ke KHwab bhi dekha na kar