yun lahakta hai tere nau-KHez KHwabon ka badan

yuuñ lahaktā hai tire nau-ḳhez ḳhvāboñ kā badan

jaise shabnam se dhule taaza gulāboñ kā badan

mutriba ne is tarah chheḌe kuchh armānoñ ke taar

kas gayā añgḌā.ī lete hī rubāboñ kā badan

koī pahnātā nahīñ be-dāġh lafzoñ kā libās

kab se uryāñ hai mohabbat kī kitāboñ kā badan

raat hai yā sañg-e-marmar kā muqaddas maqbara

jis ke andar dafn hai do māhtāboñ kā badan

ā.īñe le kar kahāñ tak ham sarāboñ ke safīr

dhuup ke sahrāoñ meñ DhūñDeñge ḳhvāboñ kā badan

jab ghulā bād-e-sabā meñ tere pairāhan kā lams

aur bhī mahkā tar-o-tāza gulāboñ kā badan

'prem' āḳhir sub.h-e-nau kholegī kab band-e-qabā

jhāñktā hai chilmanoñ se āftāboñ kā badan

yun lahakta hai tere nau-KHez KHwabon ka badan

jaise shabnam se dhule taza gulabon ka badan

mutriba ne is tarah chheDe kuchh armanon ke tar

kas gaya angDai lete hi rubabon ka badan

koi pahnata nahin be-dagh lafzon ka libas

kab se uryan hai mohabbat ki kitabon ka badan

raat hai ya sang-e-marmar ka muqaddas maqbara

jis ke andar dafn hai do mahtabon ka badan

aaine le kar kahan tak hum sarabon ke safir

dhup ke sahraon mein DhunDenge KHwabon ka badan

jab ghula baad-e-saba mein tere pairahan ka lams

aur bhi mahka tar-o-taza gulabon ka badan

'prem' aaKHir subh-e-nau kholegi kab band-e-qaba

jhankta hai chilmanon se aaftabon ka badan