یوں مخاطب نہ ہوں کہہ کر مجھے الٹا سیدھا

یوں مخاطب نہ ہوں کہہ کر مجھے الٹا سیدھا

نام لے سکتے نہیں آپ مرا کیا سیدھا

میرؔ کے خاص مرید آپ ہیں ہم مان گئے

کوئی شاگرد نہیں آپ کا چلتا سیدھا

ہم زمیں پر ہیں نمائندہ خدا کے ناصح

کیجیے آپ کسی اور کا قبلہ سیدھا

نامہ بر کو جو شہید اس نے کیا اچھا کیا

خط مرا حور تلک خلد میں پہنچا سیدھا

اس طرح خوار نہ ہوتا مری جاں لینے کو

اس کے دل میں ملک الموت جو جاتا سیدھا

ہم گنہ گار ہوئے حضرت زاہد کیونکر

نہ کیا ہم نے جو الٹا ہوا جوتا سیدھا

وہ تو کہیے کہ ہدف آپ ہلا ہوگا کہیں

آپ نے ورنہ نشانہ تو لیا تھا سیدھا

وہ بھی تنقید کیا کرتے ہیں ہم پر حارثؔ

مصرع پڑھنا نہیں آتا جنہیں سیدھا سیدھا