yun nazm-e-jahan darham-o-barham na hua tha

yuuñ nazm-e-jahāñ darham-o-barham na huā thā

aisā bhī tire husn kā aalam na huā thā

phir chheḌ diyā vus.at-e-mahshar kī fazā ne

saudā tire vahshī kā abhī kam na huā thā

yā ishrat-e-do-rozā thā yā hasrat-e-dīroz

vo lamha-e-hastī jo abhī ġham na huā thā

sad haif vo gul ho kaf-e-gul-chīñ meñ jo ab tak

āzurda-e-āvezish-e-shabnam na huā thā

qātil hī mirā kyuuñ ise kahtā hai zamāna

maanā vo sharīk-e-saf-e-mātam na huā thā

raaz aaj mire dam se huā rāz-e-mohabbat

kuchh raaz na thā jab koī mahram na huā thā

paate hī ḳhajil rahm kā dariyā umaD aayā

parda mirī āñkhoñ kā abhī nam na huā thā

rusvā na kar is soz ko ai sham-e-lab-e-gor

jo vāqif-e-dil-sozi-e-hamdam na huā thā

ghar ḳhair se taqdīr ne vīrāna banāyā

sāmān-e-junūñ mujh se farāham na huā thā

ik kufr sarāpā ne kiyā hashr kā qaa.il

maiñ mo'taqid-e-hashr-e-mujassam na huā thā

har dil meñ na.ī shān-e-tajallī hai ki 'fānī'

nashtar hai vo andāz jo marham na huā thā

yun nazm-e-jahan darham-o-barham na hua tha

aisa bhi tere husn ka aalam na hua tha

phir chheD diya wusat-e-mahshar ki faza ne

sauda tere wahshi ka abhi kam na hua tha

ya ishrat-e-do-roza tha ya hasrat-e-diroz

wo lamha-e-hasti jo abhi gham na hua tha

sad haif wo gul ho kaf-e-gul-chin mein jo ab tak

aazurda-e-awezish-e-shabnam na hua tha

qatil hi mera kyun ise kahta hai zamana

mana wo sharik-e-saf-e-matam na hua tha

raaz aaj mere dam se hua raaz-e-mohabbat

kuchh raaz na tha jab koi mahram na hua tha

pate hi KHajil rahm ka dariya umaD aaya

parda meri aankhon ka abhi nam na hua tha

ruswa na kar is soz ko ai sham-e-lab-e-gor

jo waqif-e-dil-sozi-e-hamdam na hua tha

ghar KHair se taqdir ne virana banaya

saman-e-junun mujh se faraham na hua tha

ek kufr sarapa ne kiya hashr ka qail

main mo'taqid-e-hashr-e-mujassam na hua tha

har dil mein nai shan-e-tajalli hai ki 'fani'

nashtar hai wo andaz jo marham na hua tha