yun sari umr zist ke darman mein rah gae

yuuñ saarī umr ziist ke darmāñ meñ rah ga.e

dāman silā to chaak garebāñ meñ rah ga.e

tahrīr kar sake na safar-nāma-e-hayāt

har moḌ par ta.ayyun-e-unvāñ meñ rah ga.e

manzil ko kuchh na raah kī sauġhāt de sake

jo aable the ḳhār-e-muġhīlāñ meñ rah ga.e

kāñTe chubhan malāl thakan aur be-kasī

kyā kyā the ham-safar jo bayābāñ meñ rah ga.e

kab mausam-e-bahār gayā kuchh pata nahīñ

aisā ulajh ke jaib-o-garebāñ meñ rah ga.e

ilzām ye bajā hai tirā ai ḳhayāl-e-dost

ham dil-navāzī-e-ġham-e-daurāñ meñ rah ga.e

shāna-kashoñ ne dil ko bhī shāna banā diyā

ḳham phir bhī kitne gesu-e-daurāñ meñ rah ga.e

ik ek kar ke dāġh-e-jigar de rahe the lau

yuuñ saarī raat jashn-e-charāġhāñ meñ rah ga.e

rindoñ ne apne ḳhuun se maqtal sajā diye

vaa.iz surūr-e-bāda-e-irfāñ meñ rah ga.e

ham ko to zindagī tah-e-ḳhanjar hī mil ga.ī

sab justujū-e-chashma-e-haivāñ meñ rah ga.e

'nātiq' kahāñ hai saf.ha-e-qirtās ko ḳhabar

kitne ḳhayāl zehn ke zindāñ meñ rah ga.e

yun sari umr zist ke darman mein rah gae

daman sila to chaak gareban mein rah gae

tahrir kar sake na safar-nama-e-hayat

har moD par tayyun-e-unwan mein rah gae

manzil ko kuchh na rah ki saughat de sake

jo aable the KHar-e-mughilan mein rah gae

kanTe chubhan malal thakan aur be-kasi

kya kya the ham-safar jo bayaban mein rah gae

kab mausam-e-bahaar gaya kuchh pata nahin

aisa ulajh ke jaib-o-gareban mein rah gae

ilzam ye baja hai tera ai KHayal-e-dost

hum dil-nawazi-e-gham-e-dauran mein rah gae

shana-kashon ne dil ko bhi shana bana diya

KHam phir bhi kitne gesu-e-dauran mein rah gae

ek ek kar ke dagh-e-jigar de rahe the lau

yun sari raat jashn-e-charaghan mein rah gae

rindon ne apne KHun se maqtal saja diye

waiz surur-e-baada-e-irfan mein rah gae

hum ko to zindagi tah-e-KHanjar hi mil gai

sab justuju-e-chashma-e-haiwan mein rah gae

'natiq' kahan hai safha-e-qirtas ko KHabar

kitne KHayal zehn ke zindan mein rah gae