yun sab kuchh dekh kar bhi dekhta koi nahin hai

yuuñ sab kuchh dekh kar bhī dekhtā koī nahīñ hai

so ham pe bolte haiñ boltā koī nahīñ hai

fareb-e-ā.ina hai bas tamāsha hai ye duniyā

yahāñ par sab ḳhudā haiñ aur ḳhudā koī nahīñ hai

vo kis kī aag thī kis ne jalāyā ghar hamārā

ye sab hī jānte haiñ māntā koī nahīñ hai

havā.eñ chāñd taare phuul ḳhushbū dasht dariyā

ye sab ke sab haiñ tere aur mirā koī nahīñ hai

maiñ ġhusl-e-aks karnā chāhtā huuñ aa.ina do

ki mujh meñ ab bhī maiñ rahtā huuñ yā koī nahīñ hai

chalo ab maan lo ye dūriyāñ ḳhud-sāḳhta haiñ

vagarna dil se dil tak fāsla koī nahīñ hai

yun sab kuchh dekh kar bhi dekhta koi nahin hai

so hum pe bolte hain bolta koi nahin hai

fareb-e-aina hai bas tamasha hai ye duniya

yahan par sab KHuda hain aur KHuda koi nahin hai

wo kis ki aag thi kis ne jalaya ghar hamara

ye sab hi jaante hain manta koi nahin hai

hawaen chand tare phul KHushbu dasht dariya

ye sab ke sab hain tere aur mera koi nahin hai

main ghusl-e-aks karna chahta hun aaina do

ki mujh mein ab bhi main rahta hun ya koi nahin hai

chalo ab man lo ye duriyan KHud-saKHta hain

wagarna dil se dil tak fasla koi nahin hai