yun samajh lo ki ba-juz nam-e-KHuda kuchh na raha

yuuñ samajh lo ki ba-juz nām-e-ḳhudā kuchh na rahā

jal ke is aag meñ sab ḳhaak huā kuchh na rahā

kis kā sar kis kī ridā kis kā makāñ DhūñDte ho

qatl o ġhārat meñ to koī na bachā kuchh na rahā

ham kisī aur ke hone kī ḳhabar kyā dete

gum hue aise ki apnā bhī patā kuchh na rahā

kachche rañgoñ kī tarah uḌ ga.e saare hī hurūf

kore kāġhaz pe thā jo kuchh bhī likhā kuchh na rahā

'mohsin' is tarah luTī mahfil-e-sāz-o-āvāz

gul-e-naġhma na koī barg-e-navā kuchh na rahā

yun samajh lo ki ba-juz nam-e-KHuda kuchh na raha

jal ke is aag mein sab KHak hua kuchh na raha

kis ka sar kis ki rida kis ka makan DhunDte ho

qatl o ghaarat mein to koi na bacha kuchh na raha

hum kisi aur ke hone ki KHabar kya dete

gum hue aise ki apna bhi pata kuchh na raha

kachche rangon ki tarah uD gae sare hi huruf

kore kaghaz pe tha jo kuchh bhi likha kuchh na raha

'mohsin' is tarah luTi mahfil-e-saz-o-awaz

gul-e-naghma na koi barg-e-nawa kuchh na raha