yun sunahri dhup bikhri hai ruKH-e-kohsar par

yuuñ sunahrī dhuup bikhrī hai ruḳh-e-kohsār par

jis tarah ġhāza chamaktā hai tire ruḳhsār par

uḌte lamhoñ ko pakaḌne kī tamannā hai abas

ye parinde to kabhī Tikte nahīñ ashjār par

vo mire chehre pe kyā maazī kī tahrīreñ paḌhe

us kī nazreñ to jamī haiñ aaj ke aḳhbār par

aaj to ik hādisa us ko bhī nañgā kar gayā

laakh parde the paḌe jis shaḳhs ke kirdār par

aarzū ye hai ki tū ai kaash ho jaa.e amar

naam terā likh rahā huuñ ret kī dīvār par

kaise kaise log āḳhir kis tarah rauñde ga.e

kaun hai 'betāb' qādir vaqt kī raftār par

yun sunahri dhup bikhri hai ruKH-e-kohsar par

jis tarah ghaza chamakta hai tere ruKHsar par

uDte lamhon ko pakaDne ki tamanna hai abas

ye parinde to kabhi Tikte nahin ashjar par

wo mere chehre pe kya mazi ki tahriren paDhe

us ki nazren to jami hain aaj ke aKHbar par

aaj to ek hadisa us ko bhi nanga kar gaya

lakh parde the paDe jis shaKHs ke kirdar par

aarzu ye hai ki tu ai kash ho jae amar

nam tera likh raha hun ret ki diwar par

kaise kaise log aaKHir kis tarah raunde gae

kaun hai 'betab' qadir waqt ki raftar par