yun tabassum-rez hai dil chashm-e-KHandan dekh kar

yuuñ tabassum-rez hai dil chashm-e-ḳhandāñ dekh kar

jaise dariyā muskurā.e māh-e-tābāñ dekh kar

bārgāh-e-nāz meñ sar ko jhukānā hī paḌā

husn kī rangīniyoñ ko juzv-e-īmāñ dekh kar

in butoñ ke ishva-e-rangīñ kī rangīñ shoḳhiyāñ

iltifāt-e-ḳhās hai mujh ko musalmāñ dekh kar

go na the nā-āshnā-e-rasm-o-rāh-e-dilbarī

phir bhī ham kho.e ga.e chashm-e-pashemāñ dekh kar

zindagī meñ quvvat-e-bālīdgī aatī ga.ī

har adā-e-husn meñ ik raaz pinhāñ dekh kar

husn kī ma.asūmiyat se dil ko hai ummīd-e-lutf

zer-e-lab ḳhandāñ hai koī dil kā armāñ dekh kar

be-dilī ne toḌ Daale rang-o-bū ke sab tilism

kyā kare koī bahār-e-sad-gulistāñ dekh kar

yun tabassum-rez hai dil chashm-e-KHandan dekh kar

jaise dariya muskurae mah-e-taban dekh kar

bargah-e-naz mein sar ko jhukana hi paDa

husn ki ranginiyon ko juzw-e-iman dekh kar

in buton ke ishwa-e-rangin ki rangin shoKHiyan

iltifat-e-KHas hai mujh ko musalman dekh kar

go na the na-ashna-e-rasm-o-rah-e-dilbari

phir bhi hum khoe gae chashm-e-pasheman dekh kar

zindagi mein quwwat-e-baalidgi aati gai

har ada-e-husn mein ek raaz pinhan dekh kar

husn ki masumiyat se dil ko hai ummid-e-lutf

zer-e-lab KHandan hai koi dil ka arman dekh kar

be-dili ne toD Dale rang-o-bu ke sab tilism

kya kare koi bahaar-e-sad-gulistan dekh kar