yun taDapte hue naushad watan se nikle

yuuñ taḌapte hue 'naushād' vatan se nikle

jis tarah bulbul-e-betāb chaman se nikle

vaa.e qismat ki huā dil na shagufta shab-e-vasl

haa.e armān na us ġhuncha-dahan se nikle

vaqt-e-ruḳhsat maiñ kahūñ kyā jo mirā haal huā

ashk jab dīda-e-ahbāb-e-vatan se nikle

baaġh meñ sūrat-e-nik.hat the tire ham vahshī

mausam-e-gul idhar aaya ki chaman se nikle

falak-e-tafraqa-andāz ne rahne na diyā

hausle kuchh bhī na yārān-e-vatan se nikle

dil jo 'naushād' lagāo to kisī gul-rū se

jaan nikle to ġham-e-ġhuncha-dahan se nikle

yun taDapte hue 'naushad' watan se nikle

jis tarah bulbul-e-betab chaman se nikle

wae qismat ki hua dil na shagufta shab-e-wasl

hae arman na us ghuncha-dahan se nikle

waqt-e-ruKHsat main kahun kya jo mera haal hua

ashk jab dida-e-ahbab-e-watan se nikle

bagh mein surat-e-nikhat the tere hum wahshi

mausam-e-gul idhar aaya ki chaman se nikle

falak-e-tafraqa-andaz ne rahne na diya

hausle kuchh bhi na yaran-e-watan se nikle

dil jo 'naushad' lagao to kisi gul-ru se

jaan nikle to gham-e-ghuncha-dahan se nikle