yun tez aandhiyon ki na zad par raha karo

yuuñ tez āñdhiyoñ kī na zad par rahā karo

chalte musāfiroñ se na dil kī kahā karo

vo kam-sinī kī shāḳh pe khiltā gulāb hai

mauj-e-sabā kī tarah use tum chhuā karo

āvārgī kī dhuup meñ jalnā bajā sahī

koī to shaam apne bhī ghar par rahā karo

ehsās us faqīr kā furqat se chuur hai

aa.e agar vo dar pe to hañs kar milā karo

ḳhushbū to saare shahr meñ us ke badan kī hai

yuuñ hī na itr kaan meñ rakh kar phirā karo

jo is qadar ḳhulūs se miltā hai in dinoñ

ban jaa.e merī zindagī ye bhī duā karo

aayā hai ḳhaak chhān ke dasht-e-havas kī vo

behtar yahī hai us se na koī gila karo

yun tez aandhiyon ki na zad par raha karo

chalte musafiron se na dil ki kaha karo

wo kam-sini ki shaKH pe khilta gulab hai

mauj-e-saba ki tarah use tum chhua karo

aawargi ki dhup mein jalna baja sahi

koi to sham apne bhi ghar par raha karo

ehsas us faqir ka furqat se chur hai

aae agar wo dar pe to hans kar mila karo

KHushbu to sare shahr mein us ke badan ki hai

yun hi na itr kan mein rakh kar phira karo

jo is qadar KHulus se milta hai in dinon

ban jae meri zindagi ye bhi dua karo

aaya hai KHak chhan ke dasht-e-hawas ki wo

behtar yahi hai us se na koi gila karo