yun Thani raat teri yaad se takrar-e-KHayal

yuuñ Thanī raat tirī yaad se takrār-e-ḳhayāl

gungunātī rahī har aan shab-e-tār-e-ḳhayāl

chhoḌ kar mere dar-o-bām vo mastūr to hai

ban ke rahtā hai magar naqsh-ba-dīvār-e-ḳhayāl

maañd paḌne lagī jab ā.īna-e-dil kī jilā

ek hī aks dikhāne lagā zañgār-e-ḳhayāl

ho ke ḳhushbū-e-gul-e-rāz uḌegā ik din

kab talak qaid rahegā pas-e-dīvār-e-ḳhayāl

tujh se qaa.em hai mirā silsila-e-vahm-o-yaqīñ

tujh ko dekhūñgā kisī roz sar-e-dār-e-ḳhayāl

harf-o-ma.anī kī tag-o-dau kā natīja ye huā

apnī aahaT se bhī Darne lagā rahvār-e-ḳhayāl

na kahīñ jins-e-girāñ hai na ḳharīdār koī

kaisā sunsān paḌā rahtā hai bāzār-e-ḳhayāl

nukta-chīñ dil na thā aur rāh-e-safar mushkil thī

log har moḌ pe karte rahe iz.hār-e-ḳhayāl

yaad aayā mujhe us shaḳhs kā jaanā 'nāsir'

jis kī sharminda-e-ehsān hai raftār-e-ḳhayāl

yun Thani raat teri yaad se takrar-e-KHayal

gungunati rahi har aan shab-e-tar-e-KHayal

chhoD kar mere dar-o-baam wo mastur to hai

ban ke rahta hai magar naqsh-ba-diwar-e-KHayal

mand paDne lagi jab aaina-e-dil ki jila

ek hi aks dikhane laga zangar-e-KHayal

ho ke KHushbu-e-gul-e-raaz uDega ek din

kab talak qaid rahega pas-e-diwar-e-KHayal

tujh se qaem hai mera silsila-e-wahm-o-yaqin

tujh ko dekhunga kisi roz sar-e-dar-e-KHayal

harf-o-mani ki tag-o-dau ka natija ye hua

apni aahaT se bhi Darne laga rahwar-e-KHayal

na kahin jins-e-giran hai na KHaridar koi

kaisa sunsan paDa rahta hai bazar-e-KHayal

nukta-chin dil na tha aur rah-e-safar mushkil thi

log har moD pe karte rahe izhaar-e-KHayal

yaad aaya mujhe us shaKHs ka jaana 'nasir'

jis ki sharminda-e-ehsan hai raftar-e-KHayal