yun to hamare shahr mein qanun bhi nahin

yuuñ to hamāre shahr meñ qānūn bhī nahīñ

qānūn kā sire se magar ḳhuun bhī nahīñ

me'yār-e-she'r merā na tum jāñch pāoge

aqdār agar nahīñ hai to shab-ḳhūn bhī nahīñ

yuuñ to koī sharīf bulātā nahīñ mujhe

lekin maiñ saare shahr meñ mat’ūn bhī nahīñ

maiñ jis kā bojh sar pe liye phir rahā huuñ aaj

suntā huuñ ye ki vo mirā mamnūn bhī nahīñ

kyoñ hañs rahe haiñ aap mirā ghar hai lāpata

is naqshe meñ to aap kā rangūn bhī nahīñ

jaane kahāñ gayā hai vo merā sharīk-e-ġham

ḳhat bhī nahīñ hai koī koī phone bhī nahīñ

kyoñ mujh se ‘askarī kī tarah milte ho 'nazar'

maiñ to tumhārā bhaa.ī humāyūn bhī nahīñ

yun to hamare shahr mein qanun bhi nahin

qanun ka sire se magar KHun bhi nahin

me'yar-e-she'r mera na tum jaanch paoge

aqdar agar nahin hai to shab-KHun bhi nahin

yun to koi sharif bulata nahin mujhe

lekin main sare shahr mein mat’un bhi nahin

main jis ka bojh sar pe liye phir raha hun aaj

sunta hun ye ki wo mera mamnun bhi nahin

kyon hans rahe hain aap mera ghar hai lapata

is naqshe mein to aap ka rangun bhi nahin

jaane kahan gaya hai wo mera sharik-e-gham

KHat bhi nahin hai koi koi phone bhi nahin

kyon mujh se ‘askari ki tarah milte ho 'nazar'

main to tumhaara bhai humayun bhi nahin