yun to hangame bahut dil mein bapa rahte hain

yuuñ to hangāme bahut dil meñ bapā rahte haiñ

ham baḌe ḳhush haiñ ki rāzī-ba-razā rahte haiñ

sajtī rahtī haiñ hamāre hī liye dār-o-salīb

koī bhī daur ho ham surḳh-qabā rahte haiñ

zaḳhm haiñ siine meñ lekin hai tabassum lab par

ham ba-taqlīd-e-rah-o-rasm-e-vafā rahte haiñ

apnī nazroñ meñ to ne.amat sī hai ne.amat yaaro

hoñge vo aur jo hastī se ḳhafā rahte haiñ

hind kī ḳhaak kā har zarra hai taqdīs-ma.āb

zarre zarre ke tale ahl-e-safā rahte haiñ

ishq ke bandoñ se kyā tujh ko ġharaz ai duniyā

ham ki haiñ sab se alag sab se judā rahte haiñ

roz le aatī hai un zulfoñ kī ḳhushbū ham tak

ham tire faiz pe ai bād-e-sabā rahte haiñ

apnī pahchān hazāroñ meñ bhī ho jā.egī

ek hī vaz.a pe ham sub.h-o-masā rahte haiñ

naġhmagī de ke har ik nāla-e-ġham ko 'maġhmūm

ham haiñ majbūr-e-navā naġhma-sarā rahte haiñ

yun to hangame bahut dil mein bapa rahte hain

hum baDe KHush hain ki raazi-ba-raza rahte hain

sajti rahti hain hamare hi liye dar-o-salib

koi bhi daur ho hum surKH-qaba rahte hain

zaKHm hain sine mein lekin hai tabassum lab par

hum ba-taqlid-e-rah-o-rasm-e-wafa rahte hain

apni nazron mein to neamat si hai neamat yaro

honge wo aur jo hasti se KHafa rahte hain

hind ki KHak ka har zarra hai taqdis-maab

zarre zarre ke tale ahl-e-safa rahte hain

ishq ke bandon se kya tujh ko gharaz ai duniya

hum ki hain sab se alag sab se juda rahte hain

roz le aati hai un zulfon ki KHushbu hum tak

hum tere faiz pe ai baad-e-saba rahte hain

apni pahchan hazaron mein bhi ho jaegi

ek hi waza pe hum subh-o-masa rahte hain

naghmagi de ke har ek nala-e-gham ko 'maghmum

hum hain majbur-e-nawa naghma-sara rahte hain