yun to hasin aksar hote hain shan wale

yuuñ to hasīn aksar hote haiñ shaan vaale

lekin kuchh aur hai tū o ān-bān vaale

nāqūs-e-dair phūñkūñ kā'be meñ yā azaan duuñ

tujh ko kahāñ pukārūñ o lā-makān vaale

mimbar pe baiTh kar tū itnā bahak na vā'iz

kaisī ye nīchī bāteñ ūñchī dukān vaale

ye husn ye javānī mehmāñ hai chand roza

is par na kar ye ġharra o ān-bān vaale

kā'be ko shaiḳh jaa.e but-ḳhāne ko barahman

yūñhī DaTe raheñge us āstān vaale

abrū pe Daal kar bal tirchhī nazar na kar tū

ye tiir kaj paḌegā bāñkī kamān vaale

ġhairoñ pe to nazar hai merī bhī kuchh ḳhabar hai

maiñ bhī miTā huā huuñ o ān-bān vaale

talvār khīñch kar kyā baazū ko dekhtā hai

do haath bas lagā de ab imtihān vaale

qaa.il tirā jahāñ hai haañ farq darmiyāñ hai

kuchh haiñ yaqīn vaale kuchh haiñ gumān vaale

farhād qais donoñ de baiThe jaan āḳhir

marte haiñ baat hī par jitne haiñ aan vaale

vo kis liye bulā.eñ jaa.eñ 'hafīz' ham kyuuñ

vo bhī haiñ shaan vaale ham bhī haiñ aan vaale

yun to hasin aksar hote hain shan wale

lekin kuchh aur hai tu o aan-ban wale

naqus-e-dair phunkun ka'be mein ya azan dun

tujh ko kahan pukarun o la-makan wale

mimbar pe baiTh kar tu itna bahak na wa'iz

kaisi ye nichi baaten unchi dukan wale

ye husn ye jawani mehman hai chand roza

is par na kar ye gharra o aan-ban wale

ka'be ko shaiKH jae but-KHane ko barahman

yunhi DaTe rahenge us aastan wale

abru pe Dal kar bal tirchhi nazar na kar tu

ye tir kaj paDega banki kaman wale

ghairon pe to nazar hai meri bhi kuchh KHabar hai

main bhi miTa hua hun o aan-ban wale

talwar khinch kar kya bazu ko dekhta hai

do hath bas laga de ab imtihan wale

qail tera jahan hai han farq darmiyan hai

kuchh hain yaqin wale kuchh hain guman wale

farhad qais donon de baiThe jaan aaKHir

marte hain baat hi par jitne hain aan wale

wo kis liye bulaen jaen 'hafiz' hum kyun

wo bhi hain shan wale hum bhi hain aan wale