yun to ek zamane se be-rafiq-o-tanha hun

yuuñ to ik zamāne se be-rafīq-o-tanhā huuñ

vird-e-har-zabāñ huuñ maiñ shahr bhar kā charchā huuñ

mujh se mil ke har koī sar paTak ke rah jaa.e

jo kahīñ nahīñ jaatā maiñ vo band rastā huuñ

aa.ina magar aisā kuchh bhī to nahīñ kahtā

log mujh se kahte haiñ maiñ bhī ek chehra huuñ

khīñchte ho har jānib kis liye lakīreñ sī

maiñ na koī rāvan huuñ maiñ na koī siitā huuñ

bhaag kar kahāñ jā.ūñ kis jagah amaañ pā.ūñ

pattharoñ kī bastī meñ maiñ hī ek shīsha huuñ

sar-phirī havā.eñ ab chheḌ chheḌ jaanī haiñ

jo na shāḳh par Thahrā maiñ vo zard pattā huuñ

maz.har-e-shujā'at huuñ lekin is se kyā hāsil

maiñ hujūm-e-tiflāñ meñ rīchh kā tamāshā huuñ

dekhnā agar chāho ḳhud ko dekh lo mujh meñ

maiñ mizāj-e-daurāñ kā ā.ina-sarāpā huuñ

tishna-e-samā'at huuñ dasht meñ sadāoñ ke

baat ko tarastā huuñ gung huuñ na bahrā huuñ

log mere baare meñ kyā se kyā nahīñ kahte

maiñ bhī zaat par un kī tanz kartā rahtā huuñ

log ḳhvāh kuchh boleñ koī naam deñ mujh ko

maiñ 'ramesh-tanhā' thā maiñ 'ramesh-tanhā' huuñ

yun to ek zamane se be-rafiq-o-tanha hun

wird-e-har-zaban hun main shahr bhar ka charcha hun

mujh se mil ke har koi sar paTak ke rah jae

jo kahin nahin jata main wo band rasta hun

aaina magar aisa kuchh bhi to nahin kahta

log mujh se kahte hain main bhi ek chehra hun

khinchte ho har jaanib kis liye lakiren si

main na koi rawan hun main na koi sita hun

bhag kar kahan jaun kis jagah aman paun

pattharon ki basti mein main hi ek shisha hun

sar-phiri hawaen ab chheD chheD jaani hain

jo na shaKH par Thahra main wo zard patta hun

mazhar-e-shuja'at hun lekin is se kya hasil

main hujum-e-tiflan mein richh ka tamasha hun

dekhna agar chaho KHud ko dekh lo mujh mein

main mizaj-e-dauran ka aaina-sarapa hun

tishna-e-sama'at hun dasht mein sadaon ke

baat ko tarasta hun gung hun na bahra hun

log mere bare mein kya se kya nahin kahte

main bhi zat par un ki tanz karta rahta hun

log KHwah kuchh bolen koi nam den mujh ko

main 'ramesh-tanha' tha main 'ramesh-tanha' hun