yun to in aankhon mein aata hai nazar dariya mujhe

yuuñ to in āñkhoñ meñ aatā hai nazar dariyā mujhe

phir bhī us kā qurb rakhtā hai bahut pyāsā mujhe

zindagī bas yaar ke ġham par nahīñ hai munhasir

raat din bechain rakhtā hai ġham-e-duniyā mujhe

ab to in zaḳhmoñ se merī āshnā.ī ho ga.ī

chārāgar behtar yahī hai ab na kar achchhā mujhe

maiñ ki jis ke vāste barsoñ rahā ik aabjū

jaate jaate kar gayā vo ret kā sahrā mujhe

vaz.a kaisī kaisī badlūñ terī ḳhātir zindagī

chhoḌ rahne de zarā jaisā bhī huuñ vaisā mujhe

jab se vo dil meñ basā hai zaat merī anjuman

kaise ye kah duuñ kiyā hai ishq ne rusvā mujhe

is liye mujh se gurezāñ haiñ sahāre aaj bhī

zindagī har moḌ tak le kar ga.ī tanhā mujhe

narm ho miTTī to shāyad khil uTheñ chāhat ke phuul

maiñ ki ik bādal huuñ apnī zaat par barsā mujhe

ho ke 'ḳhāvar' bhī isī ke lutf se raushan huuñ maiñ

be-ruḳhī us kī banā degī shab-e-yaldā mujhe

yun to in aankhon mein aata hai nazar dariya mujhe

phir bhi us ka qurb rakhta hai bahut pyasa mujhe

zindagi bas yar ke gham par nahin hai munhasir

raat din bechain rakhta hai gham-e-duniya mujhe

ab to in zaKHmon se meri aashnai ho gai

chaaragar behtar yahi hai ab na kar achchha mujhe

main ki jis ke waste barson raha ek aabju

jate jate kar gaya wo ret ka sahra mujhe

waza kaisi kaisi badlun teri KHatir zindagi

chhoD rahne de zara jaisa bhi hun waisa mujhe

jab se wo dil mein basa hai zat meri anjuman

kaise ye kah dun kiya hai ishq ne ruswa mujhe

is liye mujh se gurezan hain sahaare aaj bhi

zindagi har moD tak le kar gai tanha mujhe

narm ho miTTi to shayad khil uThen chahat ke phul

main ki ek baadal hun apni zat par barsa mujhe

ho ke 'KHawar' bhi isi ke lutf se raushan hun main

be-ruKHi us ki bana degi shab-e-yalda mujhe