yun to mushkil tha tere sath guzara karna

yuuñ to mushkil thā tire saath guzārā karnā

par mire bas meñ na thā tujh se kinārā karnā

jaañ hathelī pe dhare dauḌe chale ā.eñge

bas hameñ sub.h-e-vatan ek ishāra karnā

ek hī shaḳhs se ka.ī baar mohabbat kī hai

is ko kahte haiñ mirī jaan ḳhasāra karnā

yaad ab tak mujhe aatā hai shab-e-tanhā.ī

vo tirā mujh ko sū-e-dasht pukārā karnā

ik nazar mujh pe bhī ho arz-o-samā ke mālik

terī qudrat meñ hai patthar ko sitāra karnā

chāñd kis baat kī hai tujh meñ akaḌ bol zarā

shāh-e-taiba zarā unglī kā ishāra karnā

is ta'alluq ko mire paañv kī beḌī na samajh

mujh ko aatā hai mire dost kinārā karnā

maiñ ki sahrā bhī huuñ dariyā bhī huuñ jangal bhī huuñ

mujh ko jis naam se marzī hai pukārā karnā

maiñ mukammal thā to dhutkār diyā thā tū ne

ab adhūrā huuñ adhūre pe guzārā karnā

apne hāthoñ pe liye baiThe ho āñkheñ 'dā.em'

kis ne bolā thā sar-e-tūr nazāra karnā

yun to mushkil tha tere sath guzara karna

par mere bas mein na tha tujh se kinara karna

jaan hatheli pe dhare dauDe chale aaenge

bas hamein subh-e-watan ek ishaara karna

ek hi shaKHs se kai bar mohabbat ki hai

is ko kahte hain meri jaan KHasara karna

yaad ab tak mujhe aata hai shab-e-tanhai

wo tera mujh ko su-e-dasht pukara karna

ek nazar mujh pe bhi ho arz-o-sama ke malik

teri qudrat mein hai patthar ko sitara karna

chand kis baat ki hai tujh mein akaD bol zara

shah-e-taiba zara ungli ka ishaara karna

is ta'alluq ko mere panw ki beDi na samajh

mujh ko aata hai mere dost kinara karna

main ki sahra bhi hun dariya bhi hun jangal bhi hun

mujh ko jis nam se marzi hai pukara karna

main mukammal tha to dhutkar diya tha tu ne

ab adhura hun adhure pe guzara karna

apne hathon pe liye baiThe ho aankhen 'daem'

kis ne bola tha sar-e-tur nazara karna