yun to na tere jism mein hain zinhaar hath

yuuñ to na tere jism meñ haiñ zīnhār haath

dene ke ai karīm magar haiñ hazār haath

añgḌā.iyoñ meñ phailte haiñ baar baar haath

shīsha kī samt baḌhte haiñ be-iḳhtiyār haath

Duube haiñ tark-e-sa.i se afsos to ye hai

sāhil thā haath bhar pe lagāte jo chaar haath

aatī hai jab nasīm to kahtī hai mauj-e-bahr

yuuñ aabrū sameT agar hoñ hazār haath

darpai haiñ mere qatl ke ahbāb aur maiñ

ḳhush huuñ ki mere ḳhuun meñ rañgte haiñ yaar haath

dāman-kashāñ chalī hai badan se nikal ke ruuh

khiñchte haiñ phailte haiñ jo yuuñ baar baar haath

miTtā nahīñ navishta-e-qismat kisī tarah

patthar se sar ko phoḌ ki zaanū pe maar haath

saaqī sambhālnā ki hai labrez jām-e-mai

laġhzish hai mere paañv meñ aur ra.asha-dār haath

mutrib se pūchh mas.ala-e-jabr-o-iḳhtiyār

kyā taal sam pe uThte haiñ be-iḳhtiyār haath

maiñ aur huuñ alā.eq-e-duniyā ke daam meñ

merā na ek haath na us ke hazār haath

ai 'nazm' vasl meñ bhī rahā tū na chain se

dil ko huā qarār to hai be-qarār haath

yun to na tere jism mein hain zinhaar hath

dene ke ai karim magar hain hazar hath

angDaiyon mein phailte hain bar bar hath

shisha ki samt baDhte hain be-iKHtiyar hath

Dube hain tark-e-sai se afsos to ye hai

sahil tha hath bhar pe lagate jo chaar hath

aati hai jab nasim to kahti hai mauj-e-bahr

yun aabru sameT agar hon hazar hath

darpai hain mere qatl ke ahbab aur main

KHush hun ki mere KHun mein rangte hain yar hath

daman-kashan chali hai badan se nikal ke ruh

khinchte hain phailte hain jo yun bar bar hath

miTta nahin nawishta-e-qismat kisi tarah

patthar se sar ko phoD ki zanu pe mar hath

saqi sambhaalna ki hai labrez jam-e-mai

laghzish hai mere panw mein aur rasha-dar hath

mutrib se puchh masala-e-jabr-o-iKHtiyar

kya tal sam pe uThte hain be-iKHtiyar hath

main aur hun alaeq-e-duniya ke dam mein

mera na ek hath na us ke hazar hath

ai 'nazm' wasl mein bhi raha tu na chain se

dil ko hua qarar to hai be-qarar hath