yun to shumar sab ka wahan doston mein tha

yuuñ to shumār sab kā vahāñ dostoñ meñ thā

shāmil magar na koī kisī ke dukhoñ meñ thā

mere ḳhilāf jis ne bune sāzishoñ ke jaal

vo mere dushmanoñ meñ nahīñ dostoñ meñ thā

maanā ki ham ko aap se thiiñ ranjisheñ bahut

lekin kuchh aap ke bhī ta'assub diloñ meñ thā

maiñ jāntā huuñ dūsre nāmoñ ke saath saath

ḳhud merā naam bhī to mire qātiloñ meñ thā

tūfān so ga.e the agar sat.h-e-āb par

lekin vo iztirāb jo kal sāhiloñ meñ thā

kal shab maiñ apne saath rahā thā magar nahīñ

haañ yaad aa gayā ki 'ajab uljhanoñ meñ thā

aksar to bin-piye hī maiñ bad-mast ho gayā

aisā surūr aisā nasha un rutoñ meñ thā

'bāsit' ġham-e-zamāna se ġhāfil nahīñ thā maiñ

saare jahāñ kā ġham bhī to mere ġhamoñ meñ thā

yun to shumar sab ka wahan doston mein tha

shamil magar na koi kisi ke dukhon mein tha

mere KHilaf jis ne bune sazishon ke jal

wo mere dushmanon mein nahin doston mein tha

mana ki hum ko aap se thin ranjishen bahut

lekin kuchh aap ke bhi ta'assub dilon mein tha

main jaanta hun dusre namon ke sath sath

KHud mera nam bhi to mere qatilon mein tha

tufan so gae the agar sath-e-ab par

lekin wo iztirab jo kal sahilon mein tha

kal shab main apne sath raha tha magar nahin

han yaad aa gaya ki 'ajab uljhanon mein tha

aksar to bin-piye hi main bad-mast ho gaya

aisa surur aisa nasha un ruton mein tha

'basit' gham-e-zamana se ghafil nahin tha main

sare jahan ka gham bhi to mere ghamon mein tha