yun to shumar us ka mere bhaiyon mein tha

yuuñ to shumār us kā mire bhā.iyoñ meñ thā

maiñ thā lahū lahū vo tamāshā.iyoñ meñ thā

chehre se maiñ ne ġham kī lakīreñ miTā to diiñ

lekin jo karb ruuh kī gahrā.iyoñ meñ thā

vo hausla ki pher de jo āñdhiyoñ ke ruḳh

vo hausla abhī mirī paspā.iyoñ meñ thā

detā hai roz ik nayā ilzām āj-kal

pahle vo shaḳhs bhī mire shaidā.iyoñ meñ thā

kahte haiñ ek maiñ na thā badnām shahr meñ

charchā tire bhī naam kā rusvā.iyoñ meñ thā

'irfāñ' vo kam-nasīb ki thā jān-e-anjuman

yāroñ ke beach rah ke bhī tanhā.iyoñ meñ thā

yun to shumar us ka mere bhaiyon mein tha

main tha lahu lahu wo tamashaiyon mein tha

chehre se main ne gham ki lakiren miTa to din

lekin jo karb ruh ki gahraiyon mein tha

wo hausla ki pher de jo aandhiyon ke ruKH

wo hausla abhi meri paspaiyon mein tha

deta hai roz ek naya ilzam aaj-kal

pahle wo shaKHs bhi mere shaidaiyon mein tha

kahte hain ek main na tha badnam shahr mein

charcha tere bhi nam ka ruswaiyon mein tha

'irfan' wo kam-nasib ki tha jaan-e-anjuman

yaron ke beach rah ke bhi tanhaiyon mein tha