yun to uski wusaton mein kya nahin

yuuñ to us kī vus.atoñ meñ kyā nahīñ

vo samundar hai magar gahrā nahīñ

ghaT gayā sab zor-e-sailāb-e-junūñ

karb kā dariyā magar utrā nahīñ

dūsroñ se nisbatoñ kā kyā savāl

merā ḳhud se bhī koī rishta nahīñ

dekhtā huuñ jo vo kartā huuñ raqam

maiñ ḳhilāf-e-sāneha likhtā nahīñ

maiñ samundar vo sulagtā dasht hai

mere jaisā merā ham-sāya nahīñ

ham zamīñ vaale hī shar-angez haiñ

āsmāñ se koī shar utrā nahīñ

qātilo ye munsifoñ kā shahr hai

ḳhuun mahñgā hai yahāñ sastā nahīñ

mere jism-o-jāñ pe us kā iḳhtiyār

maiñ ne jis kā aks bhī dekhā nahīñ

mujh pe bhī utrā sahīfa dard kā

maiñ bhī tujh jaisā huuñ tū tanhā nahīñ

yun to us ki wusaton mein kya nahin

wo samundar hai magar gahra nahin

ghaT gaya sab zor-e-sailab-e-junun

karb ka dariya magar utra nahin

dusron se nisbaton ka kya sawal

mera KHud se bhi koi rishta nahin

dekhta hun jo wo karta hun raqam

main KHilaf-e-saneha likhta nahin

main samundar wo sulagta dasht hai

mere jaisa mera ham-saya nahin

hum zamin wale hi shar-angez hain

aasman se koi shar utra nahin

qatilo ye munsifon ka shahr hai

KHun mahnga hai yahan sasta nahin

mere jism-o-jaan pe us ka iKHtiyar

main ne jis ka aks bhi dekha nahin

mujh pe bhi utra sahifa dard ka

main bhi tujh jaisa hun tu tanha nahin