یوں تم نے جو ہنس کر مجھے دیکھا نہیں ہوتا

یوں تم نے جو ہنس کر مجھے دیکھا نہیں ہوتا

میں نے بھی قدم اپنا بڑھایا نہیں ہوتا

وہ حسن کا قصہ نہ اداؤں کی کہانی

معصوم کوئی شہر میں رسوا نہیں ہوتا

یہ پھول بھی خوش رنگ کہاں ہوتے نظر میں

گلشن سے کبھی یار جو گزرا نہیں ہوتا

نیندیں نہ کبھی آنکھ سے یوں روٹھ کے جاتیں

آنکھوں میں کوئی خواب سمایا نہیں ہوتا

پھر لذت گریہ سے کہاں ہوتا تعارف

پھر وسعت صحرا کو بھی سوچا نہیں ہوتا

ہرگز نہ سلگتا خس و خاشاک کا جنگل

شعلہ جو ترے لمس کا پایا نہیں ہوتا

بارش نے کبھی آگ لگائی نہیں ہوتی

خواہش نے کبھی ہم کو بھگویا نہیں ہوتا

یہ رنگ کہاں ہوتا نعیمؔ اپنی غزل میں

گر آج رواں یاد کا دریا نہیں ہوتا