yun tumne jo hans kar mujhe dekha nahin hota

yuuñ tum ne jo hañs kar mujhe dekhā nahīñ hotā

maiñ ne bhī qadam apnā baḌhāyā nahīñ hotā

vo husn kā qissa na adāoñ kī kahānī

mā'sūm koī shahr meñ rusvā nahīñ hotā

ye phuul bhī ḳhush-rang kahāñ hote nazar meñ

gulshan se kabhī yaar jo guzrā nahīñ hotā

nīñdeñ na kabhī aañkh se yuuñ ruuTh ke jātīñ

āñkhoñ meñ koī ḳhvāb samāyā nahīñ hotā

phir lazzat-e-girya se kahāñ hotā ta'āruf

phir vus’at-e-sahrā ko bhī sochā nahīñ hotā

hargiz na sulagtā ḳhas-o-ḳhāshāk kā jangal

sho'la jo tire lams kā paayā nahīñ hotā

bārish ne kabhī aag lagā.ī nahīñ hotī

ḳhvāhish ne kabhī ham ko bhigoyā nahīñ hotā

ye rang kahāñ hotā 'na'īm' apnī ġhazal meñ

gar aaj ravāñ yaad kā dariyā nahīñ hotā

yun tum ne jo hans kar mujhe dekha nahin hota

main ne bhi qadam apna baDhaya nahin hota

wo husn ka qissa na adaon ki kahani

ma'sum koi shahr mein ruswa nahin hota

ye phul bhi KHush-rang kahan hote nazar mein

gulshan se kabhi yar jo guzra nahin hota

ninden na kabhi aankh se yun ruTh ke jatin

aankhon mein koi KHwab samaya nahin hota

phir lazzat-e-girya se kahan hota ta'aruf

phir wus’at-e-sahra ko bhi socha nahin hota

hargiz na sulagta KHas-o-KHashak ka jangal

sho'la jo tere lams ka paya nahin hota

barish ne kabhi aag lagai nahin hoti

KHwahish ne kabhi hum ko bhigoya nahin hota

ye rang kahan hota 'na'im' apni ghazal mein

gar aaj rawan yaad ka dariya nahin hota