yun uDati hai jo hawa mujhko

yuuñ uḌātī hai jo havā mujh ko

pahle halkā bahut kiyā mujh ko

muddatoñ se yahāñ muqaffal huuñ

aa kabhī aa ke khaTkhaTā mujh ko

āḳhirī vaqt aa gayā hai kyā

de rahe haiñ sabhī duā mujh ko

tujh tak aane kabhī nahīñ degā

mere hisse kā dā.era mujh ko

roz-marra kī is kahānī meñ

koī kirdār to banā mujh ko

ishq adab hai to apne aap aa.e

gar sabaq hai to phir paḌhā mujh ko

kar ke saudā jo paañv kā baiThā

de gayā koī rāsta mujh ko

vo koī aam sā hī jumla thā

tere muñh se burā lagā mujh ko

yun uDati hai jo hawa mujh ko

pahle halka bahut kiya mujh ko

muddaton se yahan muqaffal hun

aa kabhi aa ke khaTkhaTa mujh ko

aaKHiri waqt aa gaya hai kya

de rahe hain sabhi dua mujh ko

tujh tak aane kabhi nahin dega

mere hisse ka daera mujh ko

roz-marra ki is kahani mein

koi kirdar to bana mujh ko

ishq adab hai to apne aap aae

gar sabaq hai to phir paDha mujh ko

kar ke sauda jo panw ka baiTha

de gaya koi rasta mujh ko

wo koi aam sa hi jumla tha

tere munh se bura laga mujh ko