yun wafa aazmai jati hai

yuuñ vafā āzmā.ī jaatī hai

dil kī rag rag dikhā.ī jaatī hai

apnī sūrat ke aa.ine meñ mujhe

merī sūrat dikhā.ī jaatī hai

ek halkī sī muskurāhaT se

na.ī duniyā banā.ī jaatī hai

na bane baat kuchh to hañs denā

baat yuuñ bhī banā.ī jaatī hai

jalne vaalā jale dhuāñ bhī na ho

aag yuuñ bhī lagā.ī jaatī hai

jaane vaale tujhe ḳhabar bhī hai

ik qayāmat sī aa.ī jaatī hai

chashm-e-umnīd tujh ko us kī shakl

duur se phir dikhā.ī jaatī hai

dil kī chhoTī sī ik kahānī thī

ḳhatm par vo bhī aa.ī jaatī hai

vo jo chamkā thā ik sitārā sā

ik ghaTā us pe chhā.ī jaatī hai

dil pe ubhrī thī vo jo ik tasvīr

kitnī jaldī miTā.ī jaatī hai

lau lagā.ī thī sham-e-mahfil se

vo bhī ab jhilmilā.ī jaatī hai

dūsroñ se 'razā' kisī kī yaad

kis tarah se bhulā.ī jaatī hai

yun wafa aazmai jati hai

dil ki rag rag dikhai jati hai

apni surat ke aaine mein mujhe

meri surat dikhai jati hai

ek halki si muskurahaT se

nai duniya banai jati hai

na bane baat kuchh to hans dena

baat yun bhi banai jati hai

jalne wala jale dhuan bhi na ho

aag yun bhi lagai jati hai

jaane wale tujhe KHabar bhi hai

ek qayamat si aai jati hai

chashm-e-umnid tujh ko us ki shakl

dur se phir dikhai jati hai

dil ki chhoTi si ek kahani thi

KHatm par wo bhi aai jati hai

wo jo chamka tha ek sitara sa

ek ghaTa us pe chhai jati hai

dil pe ubhri thi wo jo ek taswir

kitni jaldi miTai jati hai

lau lagai thi sham-e-mahfil se

wo bhi ab jhilmilai jati hai

dusron se 'raza' kisi ki yaad

kis tarah se bhulai jati hai