yun zindagi ki humne siyah raat kaT di

yuuñ zindagī kī ham ne siyah raat kaaT dī

bin chhat ke ghar meñ jaise ki barsāt kaaT dī

aatā ho mulk-o-qaum kī izzat pe jis se harf

ham ne ḳhudā-gavāh vo har baat kaaT dī

guzrī jo nāgavār hamāre zamīr ko

mil bhī ga.ī to ham ne vo sauġhāt kaaT dī

ban jaa.e vaj.h-e-dushmanī jo do gharoñ ke beach

bachchoñ kī ham ne aisī mulāqāt kaaT dī

tūfāñ meñ bhī ḳhudā ke havāle rahī hayāt

yuuñ hañs ke ham ne gardish-e-āfāt kaaT dī

tark-e-ta.alluqāt kā anjām soch kar

ham ne tamām umr tire saath kaaT dī

ahl-e-ġharaz kī chalne na dī koī ham ne chaal

matlab-parast logoñ kī har baat kaaT dī

jin se na kuchh milā hameñ rusvā.ī ke sivā

un dostoñ kī ham ne mulāqāt kaaT dī

'nayyar' ko le chalī thī jo shahr-e-ġhurūr meñ

ham ne vo rahguzār-e-ḳhurāfāt kaaT dī

yun zindagi ki hum ne siyah raat kaT di

bin chhat ke ghar mein jaise ki barsat kaT di

aata ho mulk-o-qaum ki izzat pe jis se harf

hum ne KHuda-gawah wo har baat kaT di

guzri jo nagawar hamare zamir ko

mil bhi gai to hum ne wo saughat kaT di

ban jae wajh-e-dushmani jo do gharon ke beach

bachchon ki hum ne aisi mulaqat kaT di

tufan mein bhi KHuda ke hawale rahi hayat

yun hans ke hum ne gardish-e-afat kaT di

tark-e-talluqat ka anjam soch kar

hum ne tamam umr tere sath kaT di

ahl-e-gharaz ki chalne na di koi hum ne chaal

matlab-parast logon ki har baat kaT di

jin se na kuchh mila hamein ruswai ke siwa

un doston ki hum ne mulaqat kaT di

'nayyar' ko le chali thi jo shahr-e-ghurur mein

hum ne wo rahguzar-e-KHurafat kaT di