yunhi kufr har subh har sham hoga

yūñhī kufr har sub.h har shaam hogā

ilāhī kabhū yaañ bhī islām hogā

kahīñ kaam meñ vo to ḳhud-kām hogā

yahāñ kaam āḳhir hai vaañ kaam hogā

yahī dil agar hai yahī be-qarārī

tah-e-ḳhāk bhī ḳhaak ārām hogā

sanam tiin pāñch aap kā chaar din hai

sadā ek allāh kā naam hogā

ye mizhgāñ vo haiñ jin kī kāvish se ik din

mushabbak jigar misl-e-bādām hogā

buto jab ki āġhāz-e-ulfat hai ye kuchh

ḳhudā jaane kyā is kā anjām hogā

duā ke evaz gāliyāñ aur to kyā

ināyāt yahī mujh ko in.aam hogā

ye do ik balā haiñ giraftār un kā

koī sub.h hogā koī shaam hogā

yahī sub.h aur shaam tak gar amal hai

amal terī zulfoñ kā tā-shām hogā

maiñ vo nā-tavāñ huuñ agar zab.h kiije

na ik naala mujh se sar-anjām hogā

jū bismil tū kartā hai bismillāh ai shoḳh

tire kaam meñ merā bhī kaam hogā

mirī lag rahīñ chhat se āñkheñ haiñ dekho

musharraf kab is se lab-e-bām hogā

kabhū tū bhī hogā musalmān ai but

sadā terā jhūTā hī paiġhām hogā

shikār-e-ajal hoñge ik roz ham sab

hamesha na rustam na yaañ saam hogā

kahāñ hai vo said-afganī gor meñ aah

ḳhudā jaane kyā hāl-e-bahrām hogā

na sun merī 'ehsā۔n' mubārak tujhe ishq

mujhe kyā tirā naam badnām hogā

yunhi kufr har subh har sham hoga

ilahi kabhu yan bhi islam hoga

kahin kaam mein wo to KHud-kaam hoga

yahan kaam aaKHir hai wan kaam hoga

yahi dil agar hai yahi be-qarari

tah-e-KHak bhi KHak aaram hoga

sanam tin panch aap ka chaar din hai

sada ek allah ka nam hoga

ye mizhgan wo hain jin ki kawish se ek din

mushabbak jigar misl-e-baadam hoga

buto jab ki aaghaz-e-ulfat hai ye kuchh

KHuda jaane kya is ka anjam hoga

dua ke ewaz galiyan aur to kya

inayat yahi mujh ko inam hoga

ye do ek bala hain giraftar un ka

koi subh hoga koi sham hoga

yahi subh aur sham tak gar amal hai

amal teri zulfon ka ta-sham hoga

main wo na-tawan hun agar zabh kije

na ek nala mujh se sar-anjam hoga

ju bismil tu karta hai bismillah ai shoKH

tere kaam mein mera bhi kaam hoga

meri lag rahin chhat se aankhen hain dekho

musharraf kab is se lab-e-baam hoga

kabhu tu bhi hoga musalman ai but

sada tera jhuTa hi paigham hoga

shikar-e-ajal honge ek roz hum sab

hamesha na rustam na yan sam hoga

kahan hai wo said-afgani gor mein aah

KHuda jaane kya haal-e-bahram hoga

na sun meri 'ehsa۔n' mubarak tujhe ishq

mujhe kya tera nam badnam hoga