یوںہی ملتے رہیں ہم تم کوئی وعدہ نہ کریں

یوںہی ملتے رہیں ہم تم کوئی وعدہ نہ کریں

ہم کو جینا ہے تو خوابوں پہ بھروسا نہ کریں

میں بھی اس دور کا انساں ہوں فرشتہ تو نہیں

آپ اس طرح مری آنکھوں سے الجھا نہ کریں

پھر ادھر جائیں اسی شخص کو دیکھیں دکھ ہو

اس سے بہتر ہے کہ اس راہ سے گزرا نہ کریں

کون جانے کہ مجھے کب کہاں جانا ہوگا

گردشوں سے یہ بتا دو مرا پیچھا نہ کریں

کچھ خیالات لٹیرے بھی ہوا کرتے ہیں

دل کے دروازے کھلے چھوڑ کے سویا نہ کریں

اب یہ انداز بیاں کوئی نہ سمجھے گا بشیرؔ

غالبؔ و میرؔ کے انداز میں سوچا نہ کریں