یوںہی ملتے رہو محبت سے

یوںہی ملتے رہو محبت سے

کام ہو جائے گا سہولت سے

مجھ کو پر کاٹنے پڑے اپنے

پیڑ مرنے لگے تھے ہجرت سے

درد غم ہجر اور رسوائی

کام اتنے اور ایک اجرت سے

مدتوں بعد اس کے چہرے پر

اک تبسم ہے وہ بھی زحمت سے

آگے بڑھتا تو جھوٹ کہلاتا

سچ کو روکا گیا مہارت سے

بارہا گھر کی ہے تراش ہوئی

بد نما ہو گیا مرمت سے

آج ٹھکرا رہی ہو جس کو تم

کل خریدو گی اس کو دولت سے

زندگی ہو کہ ہو تمہارا لباس

ساری گرہیں کھلی ہیں محنت سے